ရုရှားစစ်သင်္ဘောများကို ယူကရိန်းက ဒရုန်းဖြင့်တိုက်ခိုက်

ယူကရိန်းဒရုန်းတွေက နိုဗိုရော့ခ်စီးစ် ရေတပ်စခန်းအနားက ရုရှားစစ်သင်္ဘောတစင်းနဲ့ hovercraft ဒုံးကျည်တစင်းကို တိုက်ခိုက်ခဲ့တယ်လို့ ယူကရိန်း ဒရုန်းတပ်ဖွဲ့တွေရဲ့ တပ်မှူးရောဘတ် ဘရော့ဗ်ဒီက မေ ၂၃ ရက်မှာ ပြောပါတယ်။

မေလရဲ့ ပထမ ၂၃ ရက်အတွင်း ယူကရိန်းဒရုန်းတွေက ရုရှားရေနံစက်ရုံကြီး ၁၃ ခုကို တိုက်ခိုက်ခဲ့တယ်လို့ Telegram က သီးခြားသတင်းစကားတခုမှာ ဘရော့ဗ်ဒီက ပြောပါတယ်။

ဆိပ်ကမ်းအပြင်အဆင်နဲ့ ဒေသရဲ့ မော်ကွန်းတိုက်နဲ့ ဂြိုဟ်တုပုံရိပ်တွေနဲ့ ကိုက်ညီနေလို့ အဆောက်အအုံတွေကနေ တဆင့် တည်နေရာကို အတည်ပြုနိုင်ခဲ့ပါတယ်။

ဗီဒီယိုမှာတွေ့ရတဲ့ သင်္ဘောတွေရဲ့ နာမည်နဲ့ ဗီဒီယိုရိုက်ကူးခဲ့တဲ့ ရက်စွဲကို အတည်မပြုရသေးပေမဲ့ မေလ ၂၃ ရက် မတိုင်မီ အွန်လိုင်းမှာ တင်ထားတဲ့ အရင် ဗီဒီယိုတွေကို မတွေ့ခဲ့ရပါဘူး။

ယူကရိန်းဟာ မကြာသေးမီလတွေအတွင်း ရုရှားရေနံချက်စက်ရုံတွေနဲ့ သယ်ယူပို့ဆောင်ရေး စက်ရုံတွေအပေါ် တိုက်ခိုက်မှု အရေအတွက်နဲ့ အတိုင်းအတာကို သိသိသာသာတိုးမြှင့်ခဲ့ပါတယ်။

ရုရှားသမ္မတနန်းတော်ရဲ့ စစ်ပွဲအတွက် ငွေကြေးထောက်ပံ့ဖို့ သုံးတဲ့ ရေနံနဲ့ သဘာဝဓာတ်ငွေ့တင်ပို့မှုကနေရတဲ့ ရုရှားရဲ့ဝင်ငွေကို လျှော့ချဖို့ ကြိုးပမ်းခဲ့တာပါ။

ယူကရိန်း စစ်တပ်က ယူကရိန်းနယ်စပ်ကနေ  ၁,၀၅၆ မိုင် အကွာ ရုရှားနိုင်ငံထဲက ပမ်းဒေသမှာရှိတဲ့ Metafrax Chemical ဓာတုဗေဒစက်ရုံကြီးတခုကို တိုက်ခိုက်ခဲ့တယ်လို့ ယူကရိန်း သမ္မတ ဗိုလိုဒီမာ ဇလန်းစကီးက မေ ၂၃ ရက်မှာ ပြောပါတယ်။

စနေနေ့မှာ ယူကရိန်းစစ်တပ်က ပင်လယ်နက်မှာ အကြီးဆုံးဖြစ်တဲ့ ရုရှားရဲ့ ရှက်ခရိုက်စ် ရေနံဆိပ်ကမ်းနားက ဂရူရှိုဗာ ရေနံဂိုဒေါင်ကို တိုက်ခိုက်ခဲ့တယ်လို့ ပြောပါတယ်။

ညလုံးပေါက် တိုက်ခိုက်မှုကြောင့် ရှက်ခရိုက်စ် ဆိပ်ကမ်းမှာ မီးလောင်ခဲ့တယ်လို့ ယူကရိန်းရဲ့ စစ်ဦးစီးအရာရှိက တယ်လီဂရမ်မှာ ပြောပါတယ်။

ခရစ်ဆယ်လစ်လို့ နာမည်ပေးထားတဲ့ ရေနံတင်သင်္ဘောတစင်းလည်း ပင်လယ်နက်ထဲမှာ ပစ်ခတ်ခံရပြီး ထိမှန်ခဲ့တယ်လို့ ဖော်ပြထားပါတယ်။